یہاں ایک بات اور ذکر کرنا مناسب معلوم ہوتا ہے کہ ایک انسان کے لحاظ سے ریکی یا انرجی ہیلنگ اور جادو ایک سکے کے دو رخ ہیں۔ یہ دونوں “انرجی ورک” ہیں یعنی ان دونوں میں انرجی کو استعمال کیا جاتا ہے، بس استعمال مختلف ہوتا ہے۔ جادو کا لفظ موجودہ دور میں مغربی دنیا میں کافی وسیع استعمال ہوتا ہے۔ اس کی تین قسمیں کی جاتی ہیں:

سفید: وہ جادو جو اچھے مقاصد کے لیے استعمال ہوتا ہے۔ اس کی چند مثالیں یہ ہیں:

1. شفایابی کے اعمال، جھاڑ پھونک
2. حفاظتی جادو، تعویذات
3. محبت کے جادو جن میں دوسرے کو قابو نہ کیا جائے
4. قدرتی جادو (قدرتی عناصر کا مثبت استعمال)
5. اچھے مقاصد کے لیے فرشتوں کی مدد حاصل کرنے کے عمل

سیاہ: وہ جادو جو برے مقاصد کے لیے استعمال ہوتا ہے۔ جیسے:

1. بندش اور نظر بندی (دماغ یا افعال کو کنٹرول کرنے کے لیے)
2. سفلی جادو (کسی کو نقصان پہنچانے کے لیے)
3. ڈیمونک میجک (شیاطین سے مدد لینا، چاہے مقصد اچھا ہو)

گرے: وہ جادو جو برے اور اچھے دونوں مقاصد کے لیے استعمال ہو سکتا ہے۔ جیسے:

1. دفاعی جادو (اپنے اور گھر والوں کی حفاظت اور مخالف کے حملے کو روکنے یا پلٹانے کے لیے)
2. پیش گوئی (مستقبل کے حالات بتانے کے لیے جادو)
3. مینی پولیشن جادو (حالات کو اپنے حق میں کرنے کے لیے اعمال)

جادو کے لفظ کا یہ استعمال وسیع ہے جس کا اطلاق اچھے برے تمام اعمال پرہوتا ہے۔ چنانچہ اگر آپ روحانی تعویذات اور دم کو دیکھیں تو وہ کبھی علاج کے لیے ہوتے ہیں، کبھی حفاظت کے لیے، کبھی حالات کے لیے،کبھی تسخیر کے لیے اور کبھی کسی اور کام کے لیے۔ جادو کا جدید لفظ ان سب پر صادق آتا ہے، حتی کہ یہ جڑی بوٹیوں سے علاج پر بھی صادق آتا ہے اور اسے باقاعدہ جادو کی ایک قسم سمجھا جاتا ہے۔ جو ہمارے عرف میں “جادو” کہا جاتا ہے اور جس کی ممانعت ہمیں قرآن و حدیث میں ملتی ہے وہ بلیک میجک اور گرے میں نقصان دہ اعمال ہیں۔ اسی طرح وائٹ میجک بھی اگر شرکیہ ہو یا کسی حرام کام کے ذریعے ہو تو ناجائز ہوگا۔

ہمارے یہاں معروف معانی میں جادو چونکہ نیگیٹو انرجی ورک ہے لہذا اس کے لیے جادوگر منفیت کا استعمال کرتے ہیں، یعنی ایسے کام کرتے ہیں جن سے ان میں منفی توانائی کی شدت ہو۔ اس کے لیے وہ بسا اوقات انتہائی شیطانی کام بھی کرتے ہیں تاکہ شیاطین بھی ان کی مدد کریں۔ ورنہ گندی چیزوں کا استعمال اور گندا رہنا تو عام ہوتا ہے۔ جتنی منفیت زیادہ ہوگی اتنی ہی منفی توانائی بھی مضبوط ہوگی۔ ریکی اس کے مقابلے میں مثبت انرجی ورک ہے تو اس کے لیے زندگی اور کاموں میں مثبت چیزوں کا اضافہ درکار ہوتا ہے۔ جتنے مثبت افعال زیادہ ہوں گے اتنی ہی مثبت توانائی بھی مضبوط ہوگی۔ حتی کہ ریکی ہیلرز غصے سے بچنے کی بھی کوشش کرتے ہیں۔

یوسوئی ریکی

میں نے عرض کیا کہ ریکی میں ایک ریکی کا ماہر شخص اپنے ارد گرد موجود مثبت توانائی کو اپنے جسم سے گزارتا ہے اور اپنے ہاتھوں کے ذریعے منتقل کرتا ہے۔ یہ توانائی جب اس کے جسم سے گزرتی ہے تو اسے بھی ہیل کرتی ہے اور جس تک پہنچتی ہے اسے بھی ہیل کرتی ہے۔ ریکی کی کئی اقسام ہیں جو ڈاکٹر میکاؤ یوسوئی کے بعد مختلف ماہرین نے دریافت کیں۔ میں ان میں سے اب تک یوسوئی ریکی (ابتدائی قسم)، کرونا ریکی، کنڈالینی ریکی بمع اس کی ذیلی اقسام، گولڈ ریکی اور اینجل ریکی جانتا ہوں۔ ان کے علاوہ میں انرجی ہیلنگ کے ایک طریقے کے بھی آٹھ لیولز کی ایٹونمنٹ لے چکا ہوں اور انہیں استعمال کرتا ہوں۔

ریکی کی اکثر اقسام لیولز میں تقسیم ہوتی ہیں۔ ہم “یوسوئی ریکی” سے گفتگو کی ابتدا کرتے ہیں۔ یہ بالکل ابتدائی قسم ہے جو ڈاکٹر یوسوئی نے دریافت کی تھی۔ اس کے تین یا چار لیول کیے جاتے ہیں جن کی تفصیلات میں تھوڑا اختلاف ہوتا ہے۔ پہلے لیول میں عموماً ریکی ماسٹرز طلبہ کو صرف ہاتھ رکھ کر ہیلنگ کرنے کی ایٹونمنٹ دیتے ہیں۔ دوسرے لیول سے پھر مختلف قسم کے اور مختلف مقاصد کے “سمبلز” کی ابتدا ہوتی ہے۔ لیول ٹو میں عموماً تین سمبلز (چوکورے، سے ہی کی اور ہون شا زی شو نین) ہوتے ہیں اور لیول تھری میں ماسٹر سمبل “ڈائی کو میو” ہوتا ہے جس کے ذریعے شاگرد خود کسی کو ایٹونمنٹ دے سکتا ہے۔

سمبلز

سمبلز کیا ہیں؟ آسان الفاظ میں کہیں تو کسی مخصوص انرجی کو کہیں جمع کرنے کے لیے بنائی گئی علامات ہیں۔ مثلاً ایک انرجی کا ماہر ہے اور وہ مستقل انرجی چینل کرتا ہے یعنی اپنے جسم سے گزار کر آگے پہنچاتا ہے۔ اب وہ یہ چاہتا ہے کہ میں جب بھی ایک مخصوص علامت بناؤں تو یہ انرجی اس جگہ جمع ہو جائے۔ چنانچہ وہ اس انرجی کو چینل کرتا ہے اور ایک علامت بنا لیتا ہے۔ اب جب بھی وہ یہ علامت بنائے گا تو انرجی جمع ہو جائے گی۔ یہ کام وہ جتنی بار کرتا ہے اتنا ہی علامت اور انرجی کا کنکشن مضبوط ہوتا جاتا ہے۔ ابتدا میں اس کا دماغ اس انرجی کو جمع کرتا ہے اور پھر آہستہ آہستہ اسے سوچنا بھی نہیں پڑتا۔ اب اگر وہ یہ علامت آگے سکھائے اور اس کا استعمال بڑے پیمانے پر شروع ہو جائے تو اس کا انرجی سے تعلق بھی اتنا ہی مضبوط ہو جاتا ہے۔

انسان نے اس زمین پر اب تک کروڑوں سمبلز بنائے ہیں۔ یہ جو تعویذ ہوتے ہیں یہ بھی سمبل ہوتے ہیں۔ بلکہ انہیں چار سمبلز کا مجموعہ کہنا چاہیے۔ سب سے پہلے خانوں کی شکل میں ایک تصویر ہوتی ہے جسے (خانوں کی تعداد کے لحاظ سے) مثلث، مربع، مخمس وغیرہ کہا جاتا ہے۔ پھر اس میں کچھ حروف ہوتے ہیں۔ یہ جو ابجد کے حروف ہیں یہ خود سمبلز ہیں اور ان کی انرجیز ہیں۔ ان کے مجموعے سے مختلف انرجیز کا ملاپ کیا جاتا ہے۔ پھر تعویذ میں نمبر ہوتے ہیں جو خود سمبل ہوتے ہیں۔ اور آخر میں اس میں چال ہوتی ہے جیسے آتشی وغیرہ، یہ بھی سمبل ہوتی ہے۔ ان سب سے مل کر ایک تعویذ تیار ہوتا ہے جو ایک زبردست انرجی رکھتا ہے۔

آپ نے کبھی ستارہ داؤدی کا نام سنا ہے؟ ایک چھ کونوں والا ستارہ جسے یہود کی علامت سمجھا جاتا ہے۔ اس کا اصل نام مہر سلیمانی ہے اور یہ حفاظت کا ایک طاقت ور سمبل ہے۔ بعض قدیم مسلمان بادشاہ اسے زرہ کے نیچے کپڑے پر بطور حفاظت پہنتے تھے۔ اسی طرح بعض مقبروں میں بھی بنا ہوا ملتا ہے۔ سولہویں صدی کے بعد اسے یہود نے استعمال کرنا شروع کیا اور پھر ان ہی کے نام سے معروف ہو گیا۔ اسی طرح ایک ہاتھ کا سمبل ہے جسے “خمسہ” کہا جاتا ہے۔ یہ نظر بد کے خلاف استعمال ہوتا رہا ہے۔ اس کی ابتدا تو فرعون کے دور سے ملتی ہے لیکن بعد میں اہل تشیع عاملین نے اسے پنج تن کی نسبت سے استعمال کرنا شروع کر دیا۔

اس طرح لاتعداد سمبلز ہیں۔ یہ سمبلز بنائے بھی جاتے ہیں اور بذریعہ مراقبہ انہیں دریافت بھی کیا جاتا ہے۔ لیکن مراقبے میں سمبل ملنے پر یہ دیکھنا لازم ہوتا ہے کہ وہ سمبل صحیح ہے یا شیطانی ہے۔ کہا جاتا ہے کہ ڈاکٹر میکاؤ یوسوئی کو مراقبے میں اٹھائیس سمبلز ملے تھے جنہیں وہ ہیلنگ کے دوران استعمال کرتے تھے۔ لیکن وقت کے ساتھ ساتھ ان میں سے اکثر متروک ہو گئے اور صرف چار باقی رہ گئے۔ یوسوئی ریکی کے سمبلز کی خصوصیت یہ ہے کہ آپ انہیں کبھی کسی منفی کام کے لیے استعمال نہیں کر سکتے۔ یہ نہ صرف یہ کہ کام نہیں کریں گے بلکہ آپ کے منفی ارادے پر پانی بھی پھیر سکتے ہیں۔ یہ خالص مثبت انرجیز ہیں۔

یوسوئی ریکی کے سمبلز پر ہم تفصیلی بات کرتے ہیں لیکن اس سے پہلے ایک مزے دار چیز بتاتا چلوں۔ اس ریکی کا ایک سمبل “ہون شا زی شو نین” ہے۔ یہ سمبل انرجی کو زمان اور مکان میں کہیں بھی بھیجنے کی قوت رکھتا ہے۔ مثلاً آپ پاکستان میں ہیں اور مریض امریکہ میں ہے لیکن آپ اسے وہاں ہیل کر سکتے ہیں۔ اسی طرح آپ کسی ماضی یا مستقبل کے ایونٹ پر بھی انرجی بھیج سکتے ہیں۔ اگلی اقساط میں اس کے ذریعے ریکی لیول ون کی ایٹونمنٹ مقرر کی جائے گی کہ جو شخص بھی کچھ مخصوص کام کر کے طے شدہ الفاظ ادا کرے اسے ریکی کے لیول ون کی ایٹونمنٹ مل جائے اور وہ کچھ پریکٹس کے بعد ہیلنگ کر سکے۔ اس سے پہلے ہم “سیلف ہیلنگ” کا طریقہ سیکھ لیتے ہیں تاکہ ایٹونمنٹ کے بعد ہیلنگ کی جا سکے۔